Familja Gushi që humbi jetën tragjikisht sot gjatë udhëtimit të tyre për në Vlorë, pak ditë më parë kishte ardhur nga Greqia në shtëpinë e tyre në Patos. Ata kishin vendosur sot të kalonin fundjavën në qytetin bregdetar. Fatkeqësisht, aksidenti tragjik u preu në mes rrugën dhe jetën, dy prindërve dhe dy vajzave të tyre.
Aksidenti tragjik ndodhi sot në autostradën Fier-Vlorë, ku një makinë tip ‘Audi’ me targa AA 107 XX, me shpejtësi afro 150 km/h, ku udhëtonin 3 të rinj, ka goditur nga pas mjetin tjetër tip ‘Toyota’ me targa greke, në të cilën udhëtonte një familje me 2 fëmijë të mitur, 14 dhe 9 vjeç.
Makina ‘Toyota’ është shtypur dhe shkatërruar totalisht dhe për shkak të shkatërrimit të madh është dashur ndërhyrja e zjarrfikëses dhe përdorimi i gurit freksibël për t’i nxjerrë viktimat nga makina.
Trupi i parë që doli nga mjeti ‘Toyota’ ishte i vajzës më të vogël, Eva Gushi, 9 vjeçe, e cila u nxor ende e gjallë por humbi jetën pak minuta më vonë në spital. Ndërsa trupat e familjarëve të tjerë Eduart Gushi, 44 vjeç, Silvana Gushi, 33 vjeç, Anastasia Gushi, 14 vjeçe, u nxorën të pajetë.
3 të rinjtë që udhëtonin me mjetin ‘Audi’, kanë mbetur të plagosur po ashtu.
Pasi përplasi ‘Toyota-ën’ makina është përplasur me një shtyllë elektrike duke e thyer atë dhe më pas ka përfunduar në kanalin anës rrugës. Të plagosurit Igli Madani, Fabio Lamaj dhe Glori Selimi janë jashtë rreziku për jetën. Dy prej tyre janë nisur nga Vlora në Tiranë në gjendje të stabilizuar. a.b
