Kandidati i Partisë Demokratike në Tiranë, Agron Shehaj iu bashkua thirrjes së Shtëpisë-Familje “Rozalba” për të mbështetur gratë dhe vajzat në vështirësi ekonomike dhe sociale. Ky komunitet mirëpret dhe strehon vajza të reja në vështirësi të ndryshme që falë talentit në pikturë e kanë kthyer në një mundësi për të mbështetur misionin e tyre. Shehaj mirëpriti ftesën e këtij komuniteti dhe bëri thirrje që gratë dhe vajzat të mbështeten.
“Çdo vit qeveritarët flasin për gratë apo mallëngjehen se si grave u bëhen padrejtësi, se nuk trajtohen njësoj si burrat, por fatkeqësisht janë këta qeveritarë që i bëjnë grave gjë më të keqe që mund t’i ndodhë një gruaje. Iu largojnë fëmijët e tyre nga familjet dhe shtëpitë e tyre me këtë që ka ndodhur në këto 8 vite, ku kjo valë emigracioni nuk ishte parë as në vitet e para të viteve 90’. Janë gratë dhe të rinjtë që vuajnë nga korrupsioni dhe padrejtësitë, nga mungesa e mundësive. Ndaj është e rëndësishme të ndryshojë kjo gjendje, të ndryshojë qeveria dhe jo thjeshtë të zëvëndësojmë një kryeministër me një tjetër, disa ministra me disa ministra të tjerë. Në asnjë mënyrë nuk është ndryshim i emrave por të ndryshojmë filozofinë e të jetuarit, mënyrën e të jetuarit, mënyrën e të menaxhuarit të të gjitha posteve publike. Na duhen duhen njerëz që punojnë për njerëzit, na duhen qeveritarë që punojnë për njerëzit dhe jo për vete, apo për një grup miqsh dhe klientësh. Na duhet një kryeministër që punon për njerëzit. Lulzim Basha do të jetë kryeministri që do të punojë për njerëzit. Sapo të fitojmë zgjedhet më 25 prill do i futemi punës të gjithë bashkë që kjo situatë të ndryshojë”, tha Shehaj.
Në shenjë solidariteti, Shehaj bleu disa nga pikturat e vajzave të reja të këtij komuniteti.
Shehaj me vajzat në nevojë: Na duhen qeveritarë që punojnë për njerëzit dhe jo për vete
