Ish drejtori i Përgjithshëm i Policisë në vitet 2008-2010, Ahmet Prenci ka publikuar vëllimin e tij me poezi. Aqë kur u largua nga detyra e lartë e shefit të policisë shqiptare ai ka punuar në disa institucione të luftëskundër korrupsionit dhe krimit si në ILDKP, Tatime, Prokurori etj por duket se e ka rigjetur veten edhe në letërsi. Në fakt poezitë epara i ka botuar në vitin 1985 në shtypin e kohës.
Libri me poezi është botuar nga shtëpia botuese M&B dhe mban titullin “Udhë në pasqyrë”.
Prezantimi i librit do të zhvillohet ditën e shtunë, datë 22 tetor 2016, ora 11:00, te restorant “Nëna Mbretëreshë”, Rruga e Elbasanit.
Shkrimtari Besnik Mustafaj thotë se ky botim është një surprizë e bukur jo vetëm për ata që e njohin nga larg autorin, por edhe për miqtë e tij, ndër të cilët e rendis veten. Të gjithë, pra, do të zbulojmë me këtë rast një personalitet tjetër të Ahmet Prençit, të cilin ai jo se na e kishte mbajtur fshehtë, por nuk kishte synuar kurrë ta nxirrte në pah.
Ndërsa shkrimtari Agron Tufa tregon se një cikël poetik i Prençit, i botuar në gazetën lokale të Dibrës në fund të viteve ‘80, më pati lënë mbresa të thella. Më vjen mirë e më gëzon fakti, që këto cilësi artistike janë konservuar të padëmtuara ndër vite dhe përbëjnë tharmin e poezisë së tij në këtë vëllim, shkruan ai.
