Deputeti i LSI-së Spartak Braho ka reaguar pas publikimit të bisedës audio mes tij dhe Ndre Legisit të bërë në një lokal, që ish-kryeministri Sali Berisha e quan misterioz.
I pyetur lidhur me bisedën telefonike që nxori Berisha në statusin e tij në “Facebook” deputeti Spartak Braho tha se ishte një bisedë mes shokësh, duke kujtuar grevën e vitit 2008 që i bashkoi, shkruan “BalkanWeb”.
Braho e quan Berishën paranojak përgjimesh dhe thotë se nuk e ka harruar zanatin e vjetër të informatorit.
Sipas tij, kjo bisedë është publikuar për të tërhequr vëmendjen nga kriza.
“Nuk e kuptoj se ku ishte ‘vlera’ e asaj bisede të përgjuar në një vend misterioz. Një muhabet normal shokësh që dy forcat e vjetra politike i detyruan të futen në grevë urie në vitin 2008 por si paranojak përgjimesh ai nuk e ka harruar zanatin e vjetër të informatorit dhe hedh në pazarin mediatik manipulime bisedash për të tërhequr vëmendjen nga kriza ku e ka futur PD rrangalla politike vazhdon ashtu siç thotë populli fjalën e urtë me qen dhe qime”, deklaron Braho.
Ish-kryeministri publikoi dje në mbrëmje një audio ku dëgjoheshin të flisnin Braho dhe Legisi. Në bisedë e sipër, Braho deklaronte se “e kishte mbajtur Ilir Metën me bajame”, apo se “e kishte telefonuar Rama dhe i kishte thënë se të hodhi poshtë Luan Rama”.
BISEDA
Braho: Me mire ne pension se sa po te isha ne rruge.
Legisi: Nuk është halli jonë ky
Braho: Eshtë halli i atyne.
Legisi: Halli i atyre është
Braho: Se nga greva e urisë ikët të gjithë ju. Edhe unë që ngela…
Legisi: Vetëm Iliri…
Braho: Po Ilirin e mbajta unë gjallë, ti e di shumë mirë. E ushqesha me bajame.
Qesh Legisi.
Legisi: Unë e di, gjithë jetën këtë kemi bërë.
Braho: Ça ke bo ti, mirë?
Legisi: Unë mirë. Ça me bo kot.
Braho: Rama mori në telefon në mëngjes.
Legisi: E di e di, fola unë në telefon me të. Nga ora 11:20.
Braho: E kishe knaq atë, më tha mu. Po tha ti hudhi poshtë Luan Rama. Po mirë e bëri i thashë unë, eshte Luan Rama ai.
Legisi: S’ka problem ajo punë. Kur te jesh i ngeshem pime kafe rrime. Te du fort.
