Dje, katër familje u përplasën me policinë dhe përmbaruesit për rreth 6 orë rresht për shkak se kundërshtonin një vendim gjykate të formës së prerë për të liruar banesën dhe për t’ia kthyer ish-pronarit.
Aksioni u shoqërua me tension dhe përplasje fizike mes tyre, madje disa prej familjarëve përfunduan në spital, sepse u ndjenë keq, ndërsa disa të tjerë u shoqëruan në komisariat.
Qëndrimi i Policisë së Shtetit u kritikua në masë, përfshirë edhe ministrin Sandër Lleshaj, i cili tha se reagimi i efektivëve nuk ishte dinjitoz.
Megjithatë, nëse kthehemi pas në kohë dallojmë dy reagime të ndryshme të policisë me drejtues të PS në pushtet, kur bëhet fjalë për zbatimin e vendimit nga përmbaruesit për një familje të zakonshme, si dhe për një përfaqësues politik, raporton “politiko”.
Në tetor të 2013-ës u shënua i njëjti rast, kur përmbaruesit kërkuan të lirojnë ndërtesën ku ndodhej selia e Partisë Social Demokrate në Tiranë, në atë kohë e drejtuar nga Skënder Gjinushi, ish-aleat i PS.
Pronarët dhe përmbaruesit të mbështetur nga policia private shkuan të ekzekutojnë vendimin e gjykatës për lirimin e objektit, por ata hasën në rezistencën e Policisë së Rendit, që në atë kohë ministër i Brendshëm ishte Saimir Tahiri.
Palët u konfrontuam fizikisht, policia shoqëroi disa efektivë të policisë private, madje edhe përmbaruesin për shkak të tentativës për të liruar me forcë objektin.
Siç duket edhe nga video, rasti është i ngjashëm me atë te ‘Petro Nini Luarasi’ në Tiranë, por i vetmi detaj që solli edhe reagime të ndryshme të policisë është se për selinë e PSD kundërshtonte përmbaruesit një politikan dhe jo një familje e zakonshme.
