Një person u vra mbrëmë në mesnatë ne makinën e tij në Durrës. Trupi I Martin Ndrecës është gjetur i pajetë në një automjet tip “Benz” në zonën e ish Kënetës.
Ndreca 45-vjeç është me origjinë nga Mirdita, ndërkohë që policia e Durrësit ka identifikuar autorin dhe është vënë në ndjekje të tij. Ngjarja dyshohet se ka ndodhur për motive të dobëta, ndërsa autori dyshohet të jetë shtetasi Ndue Zefi 37 vjeç.
Viktima dhe autori kanë qenë duke pirë alkool në një nga lokalet e zonës deri në orët e para të mëngjesit të sotëm. Aty ka nisur sherri midis tyre për arsye banale, duke përfunduar në vrasje.
Pas sherrit, 37 vjeçari ka shkuar në shtëpi duke marrë një armë kallashnikov dhe duke pritur viktimën pranë shtëpisë së tij.
Aty e ka qëlluar me 5 plumba, ku vetëm njëri prej tyre ka kapur 45 vjeçarin në pjesën e shpatullës, plumb i cili ka qenë fatal për të.
Njoftimi i policisë:
Më datë 24.02.2019, rreth orës 01:10, në lagjen Ish Kënetë, shtetasi N.Z. 37 vjeç, për motive të dobëta dyshohet se ka vrarë me armë zjarri shtetasin M.N., 45 vjeç, banues në kete lagje.
Autori i dyshuar pas krimit është larguar menjëherë dhe është shpallur në kërkim. Policia po punon për kapjen e tij.
Grupi Hetimor në bashkëpunim me Prokurorinë e Rrethit Gjyqësor Durrës po punojnë për zbardhjen e plotë të rrethanave te kësaj ngjarje.
