Pas blerjes së Rafinerisë së Ballshit nga një bankë tregtare, tashmë është radha e asaj të Fierit të gjendet nën sekuestro, po për shkak të borxheve. Por kësaj here është një kompani shtetërore ajo që ka kërkuar sekuestrimin e pronave të ARMO-s për shkak të detyrimeve të pashlyera.
Report TV ka mësuar se më 30 nëntor, Albetrol ka vendosur nën sekuestro 25 prona të ARMO-s, ku përfshihen trojet, objektet, asetet dhe linja teknologjike e Rafinerisë së Fierit. Në këtë mënyrë ARMO zhvishet nga dy astetet më të rëndësishme, që janë rafineritë e saj.
Më 28 tetor, Rafineria e Ballshit u ble për 25 milionë dollarë nga një bankë shqiptare e nivelit të dytë. Tjetërsimi i pronës mbi rafineritë vjen vetëm pak muaj pasi Qeveria ia kaloi atë kompanisë Ionian Refining dhe Trading Company me qëllim riaktivizimin e saj. U pretendua se Ionian Refining dhe Trading Company, ka arritur të gjejë gjuhën e përbashkët me bankat kreditore të ARMO-s si dhe punonjësve të saj për rifillimin e punës nga 1 shtatori. Por, po në gjatë këtyre dy muajve disa zyra përmabrimore janë vërsulur për bllokimin apo ekzekutimin e llogarive dhe pasurive të kompanisë për llogari të kreditorëve të saj, ndërkohë që u shënua edhe një aksident i rëndë ku gjeti vdekjen një prej punonjësve.
E megjithatë, Ionian Refining dhe Trading Company, ka vazhduar punën gjatë gjithë këtyre muajve. Kompania është themeluar nga një shoqëri e regjistruar në Ishujt Virxhin britanikë, e njohur si parasjë fiskale. Përfaqësues ligjor i degës Shqiptare rezulton Taulant Musabelliu, ndërsa i kompanisë mëmë Ali Hasan Rahman.
Prej kohësh kompania ARMO është në një situatë tejet të vështirë financiare. Një pjesë e mirë e aseteve të saj rezultojnë të sekuestruara apo të nxjerra në ankand nga disa banka kreditore. Sipas vlerësimeve, borxhet e ARMO-s arrijnë në total rreth 250 milionë euro, 200 milionë ndaj bankave, dhe rreth 50 milionë euro detyrime ndaj tatimeve. Aktualisht 85 % e kompanisë zotërohet nga një grup azer i quajtur Heni Asets dhe 15 % nga shteti shqiptar.
Grupi azer e bleu kompaninë nga Rezart Taçi, por u largua sërish pasi u njoh me situatën e borxheve të saj. Aktualisht vetëm njëra prej dy rafinerive të saj është në gjendje funksionale, por pa arritur as të mbulojë shpenzimet e pagave të punonjësve, të cilët kanë protestuar në vazhdimësi për shkak të mos shlyerjes së pagave.
I bllokon 25 prona, Albpetrol sekuestron rafinerinë e ARMO
