Do të jetë Reali i Madridit kundërshtari i Al Ain në finalen e Botërorit të Klubeve 2018.
Ashtu siç pritej, kampionët në fuqi të Evropës kaluan pengesën Kashima falë Gareth Bale. Uellsiani shënoi një tripletë në fitoren 3-1 që spanjollët regjistruar përballë japonezëve.
Pavarësisht dominimit dhe rasteve të pafundme, duhej të vinte minuta e 44-t që Reali i Madridit të kalonte në avantazh. Kombinimi me Marcelon e nxori të vetëm përballë Suntae, 29 vjeçarin e lindur në Cardiff dhe me të majtën e kishte të lehtë të tundte rrjetën. Për të dyfishuar, Bale shfrytëzoi armën e tij më të fortë, shpejtësinë dhe pasi përfitoi nga një gabim amatoresk i mbrojtjes japoneze realizoi për 2 me 0.
Vetëm 2 minuta më pas, një kombinim me Marcelon e nxori të lirë Bale, që me një diagonale të bukur tundi rrjetën për të tretën herë. Me sulmuesin që kompletoi “hat-trick” brenda 11 minutave lojë, Shoma Doi 12 minuta përpara fundit realizoi golin e nderit për japonezët, që përballë River Plate do të shpresojnë shkallën më të ulët në podium.
Ndërkohë Reali i Madridit sfidon arabët e Al Ain të shtunën e 22 dhjetorit.
