Ambasadori rus në Turqi, Andrey Karlov ndaj të cilin mbrëmë u krye një atentat në Ankara, para sulmit terrorist, për herë të fundit iu drejtua opinionit përmes një interviste të realizuar nga Agjencia e lajmeve Anadolu , në të cilën theksoi se marrëdhëniet mes Ankarasë dhe Moskës janë gjithnjë e më intensive në të gjitha fushat.
Ambasadori Karlov në intervistën e 30 nëntorit ka folur për trendin e përmirësimit të marrëdhënieve mes dy shteteve, duke u shprehur se bashkëpunojnë nga afër për zgjidhjen paqësore të krizës në Siri, pavarësisht dallimeve që kanë rreth botëkuptimit të kësaj krize.
Intervista u realizua me rastin e mbajtjes së takimit të parë të Grupit për planifikime të përbashkëta strategjike, për çka në Antalia ishin bërë bashkë ministrat e Jashtëm të të dyja vendeve. Me këtë rast Karlov shprehu bindjen se takimi i shefave të diplomacive është i një rëndësie të veçantë për normalizimin dhe intensifikimin e marrëdhënieve të të dyja shteteve, si në rrafshin dypalësh, ashtu edhe në atë rajonal, siç është zgjidhja e krizave në Ukrainë dhe Siri.
“Siç e dini, marrëdhëniet tona dypalëshe ekonomike para rrëzimit fatkeq të avionit shënonin zhvillim të shpejtë, por pikërisht këto marrëdhënie më së shumti pësuan nga ai incident. Ne vlerësojmë se për tu kthyer në ato shifra të mëparshme do të na nevojiten dy vjet. Megjithatë, qëllimi ynë nuk është që të kthehemi vetëm te marrëdhëniet që kishim, por ti rrisim ato në nivele më të larta”, tha Karlov tre javë më parë.
Ai shtoi më tej se marrëdhëniet dypalëshe me Rusisë dhe Turqisë bazohen në projektet energjetike të “Rrjedhës Turke” dhe centralit bërthamor Akkuyu, për të shtuar se në rend të ditës është edhe themelimi i Fondit të përbashkët investues me të cilin dy shtetet do të konkurrojnë në vendet e treta.
Karlov gjithashtu tha se Rusia dhe Turqia bien dakord për domosdoshmërinë e vendosjes së paqes në Siri, ruajtjen e integritetit territorial dhe sovranitetin e vendit, por, sipas tij ky qëllim mund të arrihet vetëm me mjete politike dhe përmes përpjekjeve të përbashkëta.
“Jemi të qëndrimit se në procesin e paqes në Siri nuk duhet të marrë pjesë vetëm Asadi dhe qeveria, por edhe grupet të cilat i trajtojmë si opozitë e shëndoshë dhe e matur siriane. Në atë proces nuk guxojnë të marrin pjesë vetëm elementet terroriste. Mendoj se në atë kontekst edhe bashkësia ndërkombëtare duhet të bëjë përpjekje, sidomos Turqia dhe Rusia”, tha Karlov në intervistën e realizuar më herët.
Në intervistën e fundit për mediat në Turqi, ambasadori rus i vrarë të hënën, tha se Rusia që në vitin 2006 filloi luftën kundër organizatës terroriste FETO, (struktura paralele në shtet) e cila është përgjegjëse për tentativën e grushtit të shtetit të dështuar më 15 korrik në Turqi.
Duke rikujtuar se vite më parë në Rusi janë ndaluar të gjitha shkollat dhe institucionet e lidhura me FETO-n në krye të së cilës është Fethullah Gylen, Karlov tha se Rusia ka dënuar fuqishëm përpjekjen e grushtit të shtetit në Turqi.
“Natën e 15 korrikut ne nuk kishim asnjë dilemë se kush duhej përkrahur sepse përgjigja është më se e qartë. Presidenti i shtetit tonë, Putin, bisedoi me homologun e tij të nderuar Erdoğan dhe ishte ndër liderët e parë botëror i cili i ofroi atij përkrahje të plotë”, ka shtuar ai në intervistën e tij, shkruan Agjencia e lajmeve Anadolu
