‘Bomba’ e Politico.eu: BE ka projekt për integrimin e shpejtë të Ballkanit, por Shqipëria e Ramës nuk hyn te ….

Me një strategji të ngjashme me atë të 2016-ës kryeministri Edi Rama po krijon një frymë entuziazmi në Shqipëri, sikur vendi ynë është në hapat e fundit përsa i përket hapjes së negociatave me BE-në. Pasi loboi për një javë në vendet e unionit dhe u kthye thuajse duarbosh në vend, kryeministri me lutjet e tij për bashkëpunim me opozitën, do të krijojë një perceptim ndryshe nga ç’paraqitet në BE.

Kështu, qëndrimi që portali i mirënjohur Politico.eu mban në një artikull të sotëm për Shqipërinë është krejt i kundërt me atë që na prezanton kryeministri ynë këtu. Media e Brukselit vërtet shkruan se BE i ka hedhur sytë nga Ballkani, por gjithçka do të bëhet në mënyrë selektive. Dhe fakti shqetësues sipas artikullit është se Shqipëria me kryeministër Edi Ramën, nuk rezulton fare tek lista e të favorizuarve për të nisur negociatat me BE.

“Brukseli nuk parashikon që të gjitha vendet e Ballkanit Perëndimor të bashkohen me BE-në në të njëjtën kohë, nëse bashkohen… Në vend të kësaj, Komisioni ka vlerësuar Serbinë dhe Malin e Zi si në krye të garës për anëtarësim në vitin 2025, në mos më herët. Të dy vendet do hapin kapituj të rinj të negociatave për anëtarësim të hënën në Bruksel”, shkruan gazetari Harry Cooper.

Shkrimi më tej thekson se fokusi i BE-së tek Serbia e Mali i Zi ka shkaktuar alarm dhe zemërim mes vendeve të tjera, kryesisht në Kosovë dhe në Shqipëri. Kryeministri kosovar, Ramush Haradinaj thotë se Serbia po merr trajtim preferencial për shkak të frikës se mund të afrohet me Rusinë.

Edhe ambasadorja shqiptare në BE, Suela Janina thotë se kanë ngritur pikëpyetje se përse duheshin theksuar emrat e Serbisë dhe Malit të Zi. Ndërkohë KE thotë se ka theksuar këto emra shtetesh, sepse ato kanë nisur negociatat. Në analizë nënvizohet se diplomatët rajonalë druhen se kjo dyshe do të marrë pjesën e luanit sa i përket vëmendjes së Brukselit.

/DRONI.al/