Detaje të reja janë zbardhur lidhur me incidentin e ndodhur mbrëmjen e së shtunës në det, përballë Palasës, ku dyshohet se nga një jaht janë qëlluar të shtëna me armë zjarri në ajër.
Sipas burimeve, jahti rezulton të jetë në pronësi të Bruno Çelës, 31 vjeç, djali i biznesmenit Geront Çela, pronar i kompanisë “Brunes”, i cili është ndaluar nga Policia së bashku me tre personat e tjerë që ndodheshin në bord: Leonard Hasa, Afrim Kastrati dhe Pashk Gjini.
Bruno Çela është gjithashtu i martuar me vajzën e ish-deputetit Tom Doshi.
Pas sinjalizimit të marrë rreth orës 21:00 për të shtëna me armë nga një jaht në zonën e Palasës, Policia Kufitare, Njësia Policore Detare, Delta Forcë dhe struktura të tjera të Policisë organizuan një operacion në det dhe në tokë për ndalimin e mjetit lundrues.
Sipas të dhënave paraprake, jahti tentoi t’i shmangej ndjekjes së policisë, por u bllokua pas rreth dy orësh dhe u shoqërua në Porto Palermo.
Policia ka bërë të ditur se gjatë kontrollit të ushtruar në jaht dhe ndaj personave që ndodheshin në bord nuk u gjetën armë apo sende të tjera të kundërligjshme.
Ndërkohë, grupi hetimor vijon verifikimet për të zbardhur plotësisht rrethanat e ngjarjes dhe për të përcaktuar rolin e secilit prej personave që ndodheshin në jaht në momentin kur u raportuan të shtënat.r.k
