Kryetari i Grupit Parlamentar të Partisë Demokratike, Gazment Bardhi, ka reaguar ndaj deklaratave të kryeministrit Edi Rama për reformën administrativo-territoriale dhe kundërshtimet që kanë ardhur edhe nga socialistë ndaj projektit.
Sipas Bardhit, procesi i konsultimit publik nuk është real, por një procedurë formale për të legjitimuar një vendim të marrë më herët.
“Për flamingot socialistë të bashkive në protestë! Edi Rama nuk po zhvillon një konsultim për hartën administrativo-territoriale. Po zhvillon një konsultim formal për një vendim të paracaktuar, njësoj si tenderat e Belindës. Prandaj edhe tallet me ata që flasin. Sepse Edi Rama nuk ka ndërmend të dëgjojë askënd që mendon ndryshe prej tij dhe prek interesat e tij të ngushta. Nëse konsultimi do të ishte i sinqertë, kryeministri nuk do t’i kërcënonte kryetarët e bashkive dhe socialistët 24 karatësh që kundërshtojnë projektin e tij. Minimalisht, do t’i dëgjonte dhe do të reflektonte”, u shpreh Bardhi.
Duke iu referuar reagimeve të disa socialistëve ndaj reformës, Bardhi tha se kundërshtimet nuk lidhen me argumente historike, por me pasojat që, sipas tij, sjell projekti për qytetarët.
“Socialistët nuk i dogjën teserat e PS-së as për historinë, as për gojëdhënat, as sepse u dhimbsen 2 mijë dëshmorët që nga antikiteti, siç ironizon Edi Rama. Socialistët u bënë flamingo, sepse refuzojnë të bëhen sërish kavje për vendimet e çmendura të kryetarit dhe kryeministrit të tyre. Socialistët, demokratët, ata qytetarë të tjerë pa parti nuk po kërkojnë privilegje. Ata po ngrenë shqetësime për një reformë që e largon vendimmarrjen prej tyre, dobëson përfaqësimin e tyre dhe rrezikon t’i lërë ata me më pak shërbime”, deklaroi ai.
Në përfundim, kreu i grupit parlamentar demokrat theksoi se reforma administrativo-territoriale duhet të ndërtohet mbi interesin e qytetarëve dhe jo, sipas tij, mbi interesat elektorale të kryeministrit.
“Një reformë administrativo-territoriale duhet të ndërtohet mbi interesin e qytetarëve, jo mbi interesin e kryeministrit për të vizatuar një hartë që i shërben llogarive të tij elektorale. Në vend që të harxhojë kohën me konsultime të paracaktuara, Edi Rama nuk duhet të fshihet pas votës së Parlamentit noter. Le të shkojë të përballet me qytetarët në referendum”, përfundoi Bardhi.a.b
