Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet ndaj ish-kryebashkiakut të Divjakës, Fredi Kokoneshi, duke e marrë të pandehur për veprën penale të “shpërdorimit të detyrës”.
Për të njëjtën akuzë janë marrë të pandehur edhe Dorjan Spaho, Andi Bullari dhe Ledio Xharo.
Pas përfundimit të hetimeve, SPAK ka depozituar dosjen në Gjykatën e Posaçme Kundër Korrupsionit dhe Krimit të Organizuar (GJKKO), ku çështja do t’i nënshtrohet shqyrtimit paraprak nga gjyqtari Erjon Çela.
Sipas hetimeve, procedimi penal lidhet me disa procedura të dhënies me qira të pasurive në administrim të Bashkisë Divjakë. Konkretisht, bëhet fjalë për një sipërfaqe prej 67 hektarësh, e cila është dhënë me qira për ndërtimin e impianteve fotovoltaike.
Nga hetimet rezulton se Bashkia Divjakë ka lidhur kontrata qiraje me shoqëritë AH Power and Konstruksion sh.p.k. dhe Intex sh.p.k.. Në kohën e lidhjes së kontratave, sipërfaqja e dhënë me qira rezultonte e regjistruar në Agjencinë Shtetërore të Kadastrës si tokë bujqësore.
Sipas dosjes hetimore, Bashkia Divjakë i kishte kërkuar Ministrisë së Bujqësisë ndryshimin e kategorisë së kësaj prone, duke e kaluar nga tokë bujqësore në tokë joproduktive, me qëllim realizimin e projektit për ndërtimin e impianteve diellore.
Çështja është referuar fillimisht nga Policia e Vlorës, ndërsa hetimet u zhvilluan më pas nga SPAK për shkak të statusit të ish-kryebashkiakut.a.b
