Gjykata e Lartë ka vendosur të kthejë për rigjykim në Apeli i GJKKO çështjen që lidhet me masën e sigurisë “arrest në burg” ndaj ish-Presidentit dhe kreut të Partisë së Lirisë, Ilir Meta.
Gjykata ka prishur vendimin e Apelit të dhënë më 30 janar, me të cilin ishte rrëzuar kërkesa e Metës për zbutjen e masës së sigurisë, duke urdhëruar rishqyrtimin e çështjes nga i njëjti trup gjykues.
Megjithatë, vendimi i Gjykatës së Lartë nuk sjell ndryshim të menjëhershëm të masës së sigurisë, por hap rrugën për një shqyrtim të ri në Apel, ku do të rivlerësohen argumentet e palëve lidhur me vijimin e paraburgimit të ish-presidentit.
Sa i përket rekursit për pezullimin e afateve të paraburgimit, Gjykata e Lartë e ka rrëzuar atë, duke mos e pranuar kërkesën.
Ilir Meta ndodhet në paraburgim në ambientet e burgut 313 në Tiranë që prej tetorit të vitit 2024. Ai është nën hetim për disa çështje, përfshirë aferën CEZ-DIA, lobimin e LSI-së në SHBA dhe hetimin pasuror.
Në këtë dosje është marrë e pandehur edhe ish-bashkëshortja e tij, Monika Kryemadhi. Të dy akuzohen për korrupsion pasiv, pastrim parash dhe mosdeklarim pasurie.
