Policia e Tiranës ka finalizuar operacionin e koduar “Inventari”, duke vënë në pranga dy magazinierë të dyshuar për vjedhje të një sasie të konsiderueshme kafeje në subjektin ku punonin.
Në kuadër të këtij operacioni, janë arrestuar shtetasit Altin Kenga, 35 vjeç dhe Vasilika Kazo, 29 vjeçe, ndërsa është proceduar në gjendje të lirë shtetasi L. B., 29 vjeç, me detyrë shpërndarës.
Sipas hetimeve, tre shtetasit dyshohet se, në bashkëpunim me njëri-tjetrin dhe duke shpërdoruar detyrat, gjatë një periudhe prej tre vitesh kanë vjedhur rreth 40 000 kilogramë kafe nga subjekti ku ishin të punësuar. Më pas, produktin e kanë shitur, duke përfituar një shumë prej rreth 800 000 eurosh.
Operacioni u zhvillua pas kallëzimit të administratores së subjektit në fushën e prodhimit dhe tregtimit të kafesë, e cila kishte konstatuar mungesa të mëdha në inventar.
Materialet procedurale i janë referuar Prokurorisë së Tiranës për veprime të mëtejshme.a.b
