Nga Sami Neza
Pas vendimit të sotëm të Gjykatës Kushtetuese për të rrëzuar kërkesën e ish-presidentit Ilir Meta për heqjen e masës së sigurisë “arrest në burg”, pritet që nesër të mblidhen Kolegjet e Bashkuara të Gjykatës së Lartë për të shqyrtuar një praktikë që lidhet me përdorimin e paraburgimit.
Gjykata Kushtetuese vendosi me shumicë votash të lërë në fuqi vendimet e mëparshme të gjykatave, duke argumentuar se ndaj Ilir Metës ekzistojnë fakte dhe informacione që justifikojnë dyshimin e arsyeshëm për veprat penale për të cilat ai akuzohet. Sipas Gjykatës, masa e arrestit është vendosur për një qëllim të ligjshëm, për garantimin e mbarëvajtjes së procesit penal, dhe nuk konsiderohet joproporcionale.
Në votimin e gjyqtarëve të Kushtetueses, tre prej tyre, Marsida Xhaferrllari, Sonika Bejtia dhe relatorja Marjana Semini, votuan pro pranimit të kërkesës së Metës, ndërsa pesë të tjerë Fiona Papajorgji, Sandër Beci, Asim Vokshi, Gent Ibrahimi dhe Ilir Toska, votuan për rrëzimin e saj, duke mbështetur vijimin e masës së “arrestit në burg”.
Ndërsa është marrë ky vendim, mbledhja e nesërme e Kolegjeve të Bashkuara të Gjykatës së Lartë, mund të ndryshojë një praktikë gjyqësore lidhur me masën e sigurimit “arrest në burg” për personat që nuk kanë një vendim të formës së prerë.Nëse merret ky vendim ai është në përplasje me atë çfarë vendosi sot Gjykata Kushtetuese me rastin ‘Meta’ që është në fornë njësoj si rasti Veliaj, rasti Dumani (Nuredin), rasti Bami e të tjerë që ndodhen në arrest me burg.
Sipas kritikëve të kësaj nisme të Sokol Sadushit që drejton Gjykatën e Lartë, në fakt i vetmi kryetar gjykate në një piramidë zëvëndëskryetarësh, një interpretim i ri mund të çojë në lirimin e një numri të konsiderueshëm personash që ndodhen aktualisht në paraburgim, mes tyre zyrtarë të lartë të akuzuar për korrupsion, por edhe figura të krimit të organizuar që janë arrestuar në bashkëpunim me partnerët ndërkombëtarë.
Partia Demokratike ka reaguar përmes një deklarate të kreut të saj Sali Berisha dhe një letre të dërguar nga kreu i grupit parlamentar Gazment Bardhi drejt ndërkombëtarëve,, ku shprehen shqetësime se një vendim i tillë mund të ndikojë në luftën kundër korrupsionit dhe krimit të organizuar.
Sipas opozitës, mbledhja e Kolegjeve të Bashkuara është një nismë e kryetarit të Gjykatës së Lartë, Sokol Sadushi, për të nxjerrë nga burgu kryetarin e bashkisë së Tiranës Erion Veliaj, dhe vjen në një moment kur disa zyrtarë të lartë dhe ish-zyrtarë ndodhen nën masa sigurie për akuza të rënda, ndërsa në paraburgim ndodhen edhe persona të dyshuar për drejtimin e grupeve kriminale.
Një vendim i Gjykatës së Lartë për ndryshimin e praktikës së arrestit me burg që do të çonte në lirimin e personave në paraburgim pa vendim të formës së prerë mund të krijojë përplasje edhe me vendimin e sotëm të Gjykatës Kushtetuese për rastin e Ilir Metës dhe të ngrejë pikëpyetje për përputhshmërinë e tij me Kushtetutën.
