Presidenti i SHBA-së, Donald Trump, ka reaguar për zhvillimet e fundit mes Uashingtonit dhe Teheranit pas një armëpushimi dyjavor, duke e cilësuar situatën si një moment të rëndësishëm për paqen në botë.
Në një postim në platformën Truth Social në orët e para të mëngjesit të së mërkurës, Trump u shpreh optimist për ecurinë e situatës, duke theksuar se Irani duket i gatshëm për një zgjidhje.
“Është një ditë e madhe për paqen botërore! Irani dëshiron që kjo të ndodhë, janë lodhur mjaftueshëm. E njëjta gjë vlen edhe për të gjithë të tjerët”, shkroi ai.
Trump theksoi gjithashtu se Shtetet e Bashkuara do të kontribuojnë për rritjen e qarkullimit në Ngushticën e Hormuzit, një nga korridoret më të rëndësishme për transportin global të energjisë.
Sipas tij, në vijim priten zhvillime pozitive që mund të ndikojnë edhe në rimëkëmbjen ekonomike të Iranit.
“Do të ketë shumë veprime pozitive dhe do të gjenerohen të ardhura. Irani mund të nisë procesin e rindërtimit. Ne do të ofrojmë çdo ndihmë të nevojshme dhe do të presim që gjithçka të ecë mirë”, u shpreh presidenti amerikan.
Në përfundim të reagimit të tij, Trump tha se beson në një përfundim pozitiv të situatës dhe se rajoni i Lindjes së Mesme mund të përjetojë një periudhë zhvillimi, të cilën ai e krahasoi me atë që e quajti “Epoka e Artë” në Shtetet e Bashkuara.
