Policia e Tiranës ka finalizuar operacionin e koduar “Kontigjenti”, duke parandaluar një ngjarje të mundshme kriminale kundër personit dhe pronës, si dhe duke zbardhur dy ngjarje të tjera të mëparshme kriminale.
Në pranga ka rënë Perikli Doçi, 37 vjeç, banues në Paskuqan, i konsideruar nga policia si person me rrezikshmëri të lartë shoqërore.
Sipas policisë, gjatë operacionit shërbimet e Komisariatit Nr. 5, në bashkëpunim me specialistët e Seksionit për Hetimin e Krimeve të Rënda, i kanë bërë shenjë ndalimi një motomjeti pa targa me të cilin lëvizte 37-vjeçari. Ai nuk i është bindur urdhrit të policisë dhe është larguar me shpejtësi, duke detyruar efektivët të nisin ndjekjen.
Pas ndjekjes policore, Doçi është kapur dhe arrestuar në afërsi të liqenit të Paskuqanit. Në momentin e ndalimit ai kishte vendosur një maskë silikoni, ndërsa gjatë kontrollit fizik dhe në motomjet policia ka gjetur lëndë eksplozive gati për shpërthim, 10 litra lëndë djegëse, një armë zjarri pistoletë me municion, si dhe motomjetin pa targa që dyshohet të jetë i vjedhur.
Nga hetimet e kryera deri tani dyshohet se 37-vjeçari është autor i dy ngjarjeve të mëparshme kriminale në zonën e Paskuqanit. Më 3 tetor 2025, ai dyshohet se ka qëlluar me armë zjarri në drejtim të banesës së shtetasit Q. K. në rrugën “Besim Cera”, dhe më pas ka djegur automjetin e përdorur në krim pranë urës së fshatit Tapizë.
Ndërsa më 17 tetor 2025, dyshohet se ka hedhur lëndë plasëse në banesën e shtetasit Rr. D., në rrugën “Unaza e Madhe”, në Paskuqan 2, nga ku janë shkaktuar vetëm dëme materiale.
Policia po vijon hetimet për të identifikuar dhe kapur bashkëpunëtorët e mundshëm të 37-vjeçarit, si dhe për të zbardhur ngjarje të tjera kriminale ku ai mund të jetë i përfshirë.
Materialet procedurale i janë referuar Prokurorisë së Tiranës për veprime të mëtejshme.a.b
