Kreu i Partisë Demokratike, Sali Berisha, ka deklaruar se kryeministri Edi Rama duhet të ishte nën ndjekje penale në lidhje me çështjen e dosjes “Partizani”, ndërsa theksoi se tashmë i takon gjykatës të vendosë nëse Rama do të thirret si dëshmitar në këtë proces.
Në një deklaratë për mediat, duke iu përgjigjur pyetjes së gazetares Anila Hoxha nga Top Channel lidhur me qëndrimin e SPAK, Berisha tha se kërkesa për ta marrë në pyetje Ramën është bërë që në fillim nga të akuzuarit në këtë dosje.
Sipas Berishës, Rama ka pasur rol në ndryshimin e destinacionit të një pjese të territorit të ish-klubit sportiv “Partizani”, duke e zonuar atë si zonë urbane ndërtimi në një kohë kur, sipas tij, toka nuk ishte kthyer ende tek pronarët dhe nuk kishte pasur kërkesa për zhvillim.
Berisha pretendoi se pas këtij vendimi janë dhënë edhe leje ndërtimi në atë zonë, ndërsa më vonë, sipas tij, punimet janë bllokuar nga institucionet vendore, duke sjellë edhe një vendim gjyqësor që detyroi Bashkinë të paguante një dëmshpërblim prej rreth 320 mijë eurosh.
Në deklaratën e tij, Berisha kritikoi gjithashtu mënyrën se si po trajtohen disa çështje nga institucionet e drejtësisë, duke përmendur edhe rastin e gjyqtares Irena Gjoka, për të cilën tha se “do të gjykohet në gjykatën e saj”, gjë që sipas tij bie ndesh me praktikat e mëparshme të drejtësisë shqiptare.
Në fund, Berisha theksoi se tashmë mbetet në dorën e trupit gjykues të vendosë nëse kryeministri Rama do të thirret ose jo për të dëshmuar në lidhje me çështjen “Partizani”.
