Kryesia e Partisë Demokratike pritet të mblidhet të hënën, më 16 mars, në orën 12:00, në selinë qendrore të partisë. Në këtë mbledhje do të diskutohen disa çështje të rëndësishme që lidhen me organizimin e brendshëm të partisë dhe aksionin politik në vijim.
Në rendin e ditës parashikohet të trajtohen temat që lidhen me ndryshimet statutore, përgatitjet për mbledhjen e Kuvendit Kombëtar si dhe organizimin e protestës kombëtare të paralajmëruar për më 22 mars.
Burime nga Partia Demokratike bëjnë me dije se gjatë mbledhjes do të diskutohet veçanërisht strategjia dhe plani i organizimit për protestën e 22 marsit, e cila pritet të zhvillohet të dielën. Kryesia do të shqyrtojë gjithashtu mënyrën e mobilizimit të strukturave të partisë dhe ndarjen e detyrave për organizimin e kësaj proteste në nivel kombëtar.
Po ashtu pritet të merret vendim edhe për datën e zhvillimit të Kuvendit Kombëtar të Partisë Demokratike, ku do të zhvillohen edhe zgjedhjet për drejtimin e partisë dhe për disa prej posteve kryesore në strukturat drejtuese.
