Kryeministri Edi Rama largoi sot nga konferenca e shtypit në Kryeministri gazetaren e Syri TV, Ambrozia Meta, pas një debati mes saj dhe Kryeninistrit pas fyerjeve që kreu i qeverisë bëri ndaj televizionit.
Përplasja zgjati disa minuta dhe nisi pasi kryeministri Rama bëri komente kritike ndaj drejtuesve të televizionit Syri TV. Gazetarja Meta kundërshtoi menjëherë akuzat e kryeministrit dhe iu përgjigj në mënyrë të drejtpërdrejtë, duke sjellë një debat të ashpër mes palëve që zgjati rreth 10 minuta.
“Qytetarëve unë u përgjigjem përditë. Nuk u përgjigjem përmes televizioneve që pastrojnë paratë e grabitura nga qytetarët dhe të cilët gëzojnë imunitetin e dhunuesve”, deklaroi Rama gjatë debatit.
Gazetarja Ambrozia Meta reagoi menjëherë ndaj kësaj deklarate, duke iu drejtuar kryeministrit me pyetjen: “Po ti tregoji qytetarëve ku shkuan 50 milionë eurot e tunelit të Llogarasë?”
Pas këtij momenti, konferenca për shtyp u ndërpre. Pak minuta më vonë, komunikimi me mediat u rinis, por vetëm pasi gazetarja e Syri TV ishte larguar nga ambientet e Kryeministrisë. a.b
