Deputeti i Partisë Socialiste, Ulsi Manja, ka deklaruar në Kuvend se argumentet e paraqitura nga Struktura e Posaçme kundër Korrupsionit dhe Krimit të Organizuar (SPAK) për rreziqet procedurale ndaj deputetes Belinda Balluku nuk janë bindëse.
Gjatë fjalës së tij, Manja u ndal te pretendimi për rrezikun e intimidimit të dëshmitarëve dhe prishjes së provave, duke theksuar se ky rrezik nuk është verifikuar.
Sipas tij, SPAK nuk ka ngritur asnjë akuzë ndaj Ballukut për prishje të provave. Ai shtoi gjithashtu se rasti i një dëshmitareje të paraqitur nga prokuroria nuk është bindës, pasi sipas tij bëhet fjalë për një person që është edhe i pandehur në të njëjtin proces.
Manja argumentoi se të pandehurit nuk mbajnë përgjegjësi për deklarimet që bëjnë për sa kohë ndodhen në këtë status procedural.
Deputeti socialist foli edhe për pretendimin mbi rrezikun e arratisjes, duke theksuar se ky rrezik duhet të jetë real dhe i provuar. Sipas tij, Balluku ka udhëtuar disa herë jashtë vendit gjatë periudhës së hetimit dhe është kthyer në Shqipëri, çka sipas Manjës e rrëzon këtë argument.
Ai shtoi gjithashtu se edhe rreziku i përsëritjes së veprës penale duhet të jetë konkret dhe jo hipotetik, duke nënvizuar se Balluku nuk ushtron më funksionet e saj të mëparshme në qeveri. a.b
