Ish-zv.kryeministrja dhe ish-ministrja e Infrastrukturës dhe Energjisë, Belinda Balluku, i dorëzoi sot detyrën në krye të ministrisë pasuesit të saj, Enea Karakaçi. Gjatë ceremonisë së dorëzimit të detyrës, Balluku u ndal edhe te akuzat dhe hetimet që lidhen me emrin e saj, duke theksuar se nuk ka pasur asnjëherë lidhje me korrupsionin dhe se nuk e ka penguar drejtësinë të bëjë punën e saj.
Ajo u shpreh se beson te drejtësia e re dhe theksoi se nuk do të përmendë kurrë gjyqtarë apo prokurorë në deklaratat e saj publike. Balluku mohoi gjithashtu aludimet për pasuri të shumta, si apartamente, jahte apo mjete luksi, duke i cilësuar këto pretendime si pjesë të një “gjyqi publik”.
DEKLARATA E BALLUKUT/
“Kam vendosur ndryshe nga shumë të tjerë të mos analizoj, të mos shaj, anatemoj, dhe të jem konsistente në qëndrimin tim sa i përket drejtësisë. Nëse do t’u ktheheni deklaratave të mia për drejtësinë, nuk do gjeni kurrë asnjë deklaratë që të kundërshtojë tjetrën. Por unë besoj se drejtësia duhet të jetë e lirë dhe e pavarur. Unë besoj se drejtësia e re, si produkt i reformës në drejtësi, si produkt i vizionit të Ramës dhe PS, si produkt i një Shqipërie Europiane duhet të vazhdojë të jetë frymëzimi i këtij vendi, pasi ajo reformë u krye për t’u kthyer besimin qytetarëve te një drejtësi e drejtë dhe e pavarur. Unë besoj te kjo drejtësi dhe s’do më dëgjoni kurrë as ta lavdëroj kur godet kundërshtarët e mi politikë, dhe as ta anatemoj kur kjo drejtësi mund të prekë interesat e mia personale.
Nuk do më dëgjoni kurrë të përmend prokurorë e gjyqtarë, pasi unë besoj se ata duhet të bëjnë detyrën si unë dhe secili duhet të jetë i lirë për të vendosur dhe gjykuar, pa qenë i ndikuar nga gjyqet publike, gjysmë të vërtetat, të pavërtetat dhe gënjeshtrat. Unë s’kam dhe s’kam pasur kurrë lidhje me korrupsionin dhe nxis, që hetimi që ka nisur prej muajsh ndaj meje, dhe s’e kam penguar kurrë, si ministre, zv.kryeministre, apo si qytetare e lirë, të vijojë për të nxjerrë të vërtetën në sipërfaqe. S’kam as 300 as 30 dhe as 3 apartamente, as një e as dy jahte, as limuzina, as helikopterë dhe avionë, por të gjitha këto janë pjesë e një gjyqi publik që fatkeqësisht bëhet me lehtësinë më të madhe në këtë vend. Por për të thënë të drejtën unë jam rritur me gjyqe publike”.
Balluku u largua nga detyra e zv.kryeministres dhe ministres së Infrastrukturës dhe Energjisë, ndërsa ndaj saj ka nisur një hetim nga Struktura e Posaçme Kundër Korrupsionit dhe Krimit të Organizuar (SPAK), e cila i ka kërkuar Kuvendit heqjen e imunitetit të saj si deputete me kërkesën për arrestimin e saj. a.b
