Vendi i ngjarjes
Drejtoria Vendore e Policisë Tiranë, në bashkëpunim me Prokurorinë e Tiranës, ka finalizuar operacionin e koduar “Distanca”, duke bërë të mundur kapjen e autorit të dyshuar të një vrasjeje me thikë.
Në pranga është vënë Gazment Buçpapaj, 40 vjeç, i cili akuzohet për vrasjen e shtetasit E. P., ngjarje e ndodhur më 20 shkurt 2026 gjatë një konflikti në rrugën “Kongresi i Lushnjës” në Tiranë.
Sipas Policisë, pas një pune intensive hetimore dhe veprimesh të mirëorganizuara operacionale, u bë i mundur lokalizimi i tij në Tropojë, ku fshihej në një banesë në vendlindjen e tij. Pas mbajtjes në mbikëqyrje, u realizua ndalimi i tij.
40-vjeçari akuzohet për veprat penale “Vrasja me dashje” dhe “Prodhimi, mbajtja, blerja apo shitja pa leje e armëve të ftohta”, ndërsa materialet procedurale i janë referuar Prokurorisë së Tiranës për vijimin e hetimeve.
