Shqipëria ka vendosur të përfshijë Garda Revolucionare Islamike në listën zyrtare të organizatave terroriste, një qëndrim që u bë publik nga kryeministri Edi Rama përmes një postimi në rrjetin social X.
Në reagimin e tij pak orë pas sulmit rë Izraelot mbi Teheran, Rama thekson se “Trupa e Gardës Revolucionare Islamike është një organizatë terroriste dhe duhet të trajtohet si e tillë”, duke shtuar se Shqipëria do ta emërtojë zyrtarisht si të tillë dhe do ta përfshijë në listën e organizatave terroriste, ashtu siç kanë vepruar më parë Shtetet e Bashkuara dhe Kanadaja.
Kreu i qeverisë e lidh këtë vendim me qëndrimin e palëkundur të Shqipërisë në krah të Izraeli dhe vendeve arabe që, sipas tij, kërkojnë paqe në rajon, si dhe me mbështetjen ndaj Shteteve të Bashkuara në asistencën ushtarake që i japin Izraelit nën udhëheqjen e presidentit Donald Trump.
Rama përmend gjithashtu qëndrimin e Bashkimi Evropian dhe deklaratat e Presidentes së Komisionit Evropian, Ursula von der Leyen, lidhur me natyrën e regjimit në Teheran.
Sipas tij, për Shqipërinë kjo çështje nuk është thjesht gjeopolitikë, por lidhet drejtpërdrejt me sigurinë kombëtare, duke kujtuar edhe sulmet kibernetike që vendi ynë ka përjetuar nga Irani në vitet e fundit. “Shqipëria do të veprojë në përputhje me këtë. Ne do ta quajmë Gardën Revolucionare atë që është dhe do ta përfshijmë në listën e organizatave terroriste”, shkruan Rama, duke u bërë thirrje edhe vendeve evropiane të ndjekin të njëjtin hap.
Në fund, ai nënvizon se Shqipëria mbështet çdo përpjekje për të parandaluar që regjimi në Teheran të sigurojë kapacitete bërthamore apo ushtarake që mund të rrezikojnë Izraelin apo vende të tjera të Lindjes së Mesme, duke theksuar se “terrorizmi duhet të emërtohet dhe, sapo të emërtohet, duhet të ndalet”. a.b
