Një 41-vjeçar është vënë në pranga nga Policia e Krujës, pasi dyshohet se i ka marrë një shumë parash një të reje përmes mashtrimit dhe më pas ka përfituar kredi në emër të saj.
Specialistët për Hetimin e Krimeve në Komisariatin e Policisë Krujë, menjëherë pas kallëzimit të bërë nga një shtetase 24 vjeçe, banuese në Krujë, kanë nisur veprimet hetimore për zbardhjen e rastit. Si rezultat i hetimeve është identifikuar dhe, në bashkëpunim me shërbimet e DVP Durrës, është bërë kapja dhe arrestimi i shtetasit F. Xh., 41 vjeç, banues në Durrës, i dënuar më parë për veprën penale të mashtrimit.
Sipas hetimeve paraprake, më datë 9 shkurt 2026, 41-vjeçari dyshohet se i ka marrë 550 mijë lekë të resë, nëpërmjet mashtrimit. Po ashtu, më 24 shkurt 2026, ai ka aplikuar dhe ka përfituar një kredi në emër të saj pranë një institucioni financiar.
Materialet procedurale i janë referuar Prokurorisë për veprime të mëtejshme.
