DVP Korçë ka finalizuar operacionin policor të koduar “Blackmail”, pas 4 muajsh hetime të zhvilluara me metoda proaktive nga Seksioni për Hetimin e Krimeve Ekonomike dhe Financiare, në drejtimin e Prokurorisë.
Në kuadër të operacionit u arrestua në flagrancë shtetasi K. J., 47 vjeç, banues në Korçë, i dyshuar për veprat penale “Shtrëngimi me anë të kanosjes ose dhunës për dhënien e pasurisë” dhe “Mashtrimi”.
Sipas hetimeve, 47-vjeçari, për rreth 3 vite, ka shantazhuar një shtetas grek duke e kërcënuar me publikimin e bisedave dhe fotove intime, duke i marrë rreth 4000 euro. Po ashtu, ai dyshohet se me të njëjtin mekanizëm ka përfituar shuma të konsiderueshme parash edhe nga shtetas të tjerë grekë, që variojnë nga 30 000 deri në 40 000 euro.
Hetimet vijojnë për identifikimin dhe vënien përpara përgjegjësisë ligjore të personave të tjerë që mund të jenë përfshirë në këtë aktivitet kriminal. a.b
