Finalizohet operacioni policor i koduar “Memory”, në kuadër të të cilit u kap dhe u vu në pranga një 22-vjeçar i dënuar me 10 vite burgim.
Si rezultat i kontrolleve intensive të kryera nga shërbimet e Forcës së Posaçme “Shqiponja”, në bashkëpunim me Forcën e Posaçme “Operacionale”, dhe mbi bazën e informacioneve të siguruara në rrugë operative, u bë i mundur arrestimi i shtetasit A. Sh., 22 vjeç, banues në fshatin Aliaj, Malësi e Madhe.
Sipas Policisë, i riu ishte shpallur në kërkim pasi Gjykata e Shkodrës e ka dënuar me 10 vjet burgim për veprat penale “Vjedhja e bankave dhe e arkave të kursimit” dhe “Vjedhja me armë”, të kryera në bashkëpunim, si dhe “Mbajtja pa leje dhe prodhimi i armëve, armëve shpërthyese dhe i municionit”.
Ngjarja për të cilën ai u dënua daton në vitin 2022, kur 22-vjeçari, së bashku me dy bashkëpunëtorë, hynë të armatosur dhe të maskuar në një bankë në Koplik, duke vjedhur një shumë të konsiderueshme parash.
