Edhe pse prej katër seancash radhazi në fazën paraprake të gjykimit nuk është paraqitur në Gjykata e Posaçme kundër Korrupsionit dhe Krimit të Organizuar, mbrojtja e Benet Beci ka depozituar këtë të martë kërkesë për gjykim të shkurtuar.
Kjo kërkesë nënkupton pranimin e akteve të paraqitura nga prokuroria, pa kaluar në shqyrtimin e plotë gjyqësor dhe pa paraqitjen e kërkesave apo provave shtesë nga palët në proces. Në rast se gjykata e pranon dhe në përfundim Beci shpallet fajtor për veprën penale të “shkeljes së barazisë në tendera”, kryer në bashkëpunim, ai përfiton ulje të dënimit me një të tretën.
Seanca paraprake është shtyrë për në 17 mars, për shkak të largimit nga salla të avokatit të Adela Ruko, bashkëshortes së ish-kreut të ARRSH, Evis Berberi.
Ndërkohë, Adela Ruko si dhe të pandehurit e tjerë, Edlira Mitrushi, Jonid Kazani, Yllka Nishku, Premtim Dauti dhe Rudin Gjoni, nuk kanë dhënë ende qëndrimin e tyre lidhur me formën e gjykimit.
Sipas burimeve nga seanca, avokati Gentjan Rumano, i cili mbron Adelën Ruko, është larguar për shkak të angazhimit në një proces tjetër dhe është gjobitur me 100 mijë lekë të reja nga GJKKO. Ai është zëvendësuar përkohësisht nga një avokate e caktuar kryesisht. Mungesa e tij është bërë shkak për shtyrjen e procesit në të paktën dy raste. a.b
