Kreu i Autoriteti Rrugor Shqiptar, Ami Kozeli, së bashku me përfaqësues të gjashtë institucioneve të tjera, doli në një konferencë për mediat pasditen e 24 shkurtit për të informuar mbi situatën e krijuar nga bllokimi i aksit Librazhd–Prrenjas.
Kozeli bëri të ditur se është vendosur ndërtimi i një rruge të re alternative përgjatë hekurudhës, në shtratin e Lumi Shkumbin, me synim stabilizimin e qarkullimit dhe normalizimin e trafikut në juglindje të vendit deri në stabilizimin e plotë të rrëshqitjes së dherave. Rruga do të jetë 1.3 km e gjatë ndërsa nuk dihet se kur do të përfundojë, kohë përgjatë së cilës rruga do të jetë jashtë përdorimit.
Sipas tij, në mbledhjen e zhvilluar më 24 shkurt u vendos gjithashtu rakordimi i menjëhershëm me Hekurudha Shqiptare, Agjencinë Kombëtare të Mjedisit dhe Agjencinë e Menaxhimit të Burimeve Ujore për realizimin e këtij projekti.
Ndër masat e tjera të miratuara është edhe prishja e urës ekzistuese, tashmë jashtë funksionit, si dhe lehtësimi i ngarkesës në trupin e rrugës së dëmtuar deri në krijimin e një skarpate natyrale që do të mundësojë ndërhyrjen me mjete shpimi. Po ashtu, është vendosur sistemimi dhe disiplinimi i ujërave sipërfaqësore në gjithë zonën e prekur nga rrëshqitja.
“Aksi Librazhd–Prrenjas është një segment me rëndësi strategjike dhe do të rikthehet në funksion të plotë pasi të kemi garantuar stabilitet afatgjatë të terrenit dhe të infrastrukturës”, deklaroi Kozeli.
Në konferencë morën fjalën edhe drejtori i Hekurudha Shqiptare, Ergys Verdho, përfaqësues të Shërbimit Gjeologjik Shqiptar, si dhe drejtues nga Drejtoria e Përgjithshme e Doganave, Agjencia Kombëtare e Mbrojtjes Civile dhe Policia e Shtetit, të cilët informuan mbi masat e koordinuara për menaxhimin e situatës. m.k
