Në orën 11:00, në Gjykata e Apelit të Posaçëm kundër Korrupsionit dhe Krimit të Organizuar do të zhvillohet seanca për kryetarin e Bashkisë së Tiranës, Erion Veliaj, i cili ka kërkuar zëvendësimin e masës së sigurisë “arrest me burg”.
Çështja po shqyrtohet nga gjyqtarja Nertina Kosova. Burime bëjnë me dije se Veliaj ka paraqitur edhe garanci pasurore, në përpjekje për të lehtësuar masën aktuale të sigurimit personal.
Kryebashkiaku kundërshton vendimin e mëparshëm të dhënë nga gjyqtarja Etleva Deda, e cila ka vlerësuar se ekzistojnë kushtet dhe kriteret ligjore për vijimin e masës më të rëndë të sigurisë.
Sipas mbrojtjes, rrethanat procedurale kanë ndryshuar, pasi dosja ka kaluar tashmë për gjykim dhe provat janë administruar, çka – sipas tyre – përjashton rrezikun e prishjes apo manipulimit të provave.
Erion Veliaj ndodhet në arrest me burg që prej 10 shkurtit 2025. Ndaj tij, Prokuroria e Posaçme kundër Korrupsionit dhe Krimit të Organizuar ka ngritur 13 akuza, mes të cilave korrupsion pasiv, pastrim parash, mosdeklarim pasurie, shpërdorim detyre dhe futje të sendeve të ndaluara në institucionet e vuajtjes së dënimit.
Pjesa më e madhe e akuzave lidhet me korrupsionin pasiv, që sipas SPAK është kryer në nëntë raste. Edhe bashkëshortja e tij, Ajola Xoxa, akuzohet për korrupsion pasiv në nëntë raste.
