Prokuroria pranë Gjykatës së Shkallës së Parë në Elbasan ka nisur procedim penal lidhur me dëmtimet e rënda që çuan në bllokimin e qarkullimit në një nga akset kryesore të vendit.
Hetimet do të përqendrohen në shkaqet që sollën rrëshqitjen masive të dherave, e cila shembi një pjesë të rrugës, linjën hekurudhore dhe linjat e energjisë elektrike, duke krijuar rrezik të mëtejshëm për zonën. Në bashkëpunim me institucionet përgjegjëse, Prokuroria do të verifikojë ligjshmërinë e lejes për marrjen e inerteve në lumin Shkumbin, si edhe zbatimin e kushteve të saj.
Sipas të dhënave paraprake, përgjegjëse për dëmtimin e rrugës dyshohet të jetë kompania që po ndërton Korridori 8. Fadromat e angazhuara në punime kanë gërryer shtratin e lumit, me miratimin e institucioneve përkatëse, duke shkaktuar pasoja të rënda si rrëshqitje dherash, plasaritje dhe çarje të theksuara në trupin e rrugës.
Aksi Librazhd-Pogradec ka pësuar dëmtime serioze në disa segmente, problematika që sipas banorëve dhe drejtuesve të mjeteve ka qenë e pranishme prej javësh. Çarjet e thella kanë ngritur shqetësime për rrezikun e shembjes së urës, çka detyroi Autoriteti Rrugor Shqiptar të bllokojë plotësisht qarkullimin, duke paralizuar lidhjen me zonën e Juglindjes.
Aktualisht, i vetmi aks alternativ mbetet rruga Maliq-Moglicë, edhe kjo e prekur nga dëmtime të konsiderueshme. Prej javësh në këtë segment janë evidentuar çarje dhe shembje serioze, duke e bërë problematike qarkullimin në të vetmen lidhje funksionale mes Juglindjes dhe Tiranës.
