Thaci, Veseli, Krasniqi, Selimi
Në Gjykata Speciale në Hagë u mbajt këtë të mërkurë, 18 shkurt, një nga seancat më të rëndësishme në procesin gjyqësor ndaj ish-krerëve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi. Secili prej tyre pati në dispozicion nga 20 minuta për të paraqitur deklaratat përmbyllëse para trupit gjykues.
Katër ish-udhëheqësit e UÇK-së ndodhen në qendrën e paraburgimit në Hagë që nga nëntori i vitit 2020. Ndaj tyre janë ngritur akuza për krime lufte dhe krime kundër njerëzimit. Prokuroria ka kërkuar gjithsej 180 vite burg, përkatësisht nga 45 vite për secilin prej të akuzuarve. Akuzat janë kundërshtuar nga ekipet mbrojtëse, të cilat kanë kërkuar rrëzimin e tyre si të pabazuara.
Pas përfundimit të seancës, Gjykata ka afat deri në 90 ditë për të shpallur vendimin, megjithatë ky afat mund të tejkalohet për shkak të volumit të madh të dosjes dhe kompleksitetit të çështjes.
Gjatë fjalës së tij përmbyllëse, ish-presidenti i Kosovës, Hashim Thaçi, hodhi poshtë akuzat duke i cilësuar ato si të pabazuara dhe të ndikuara nga narrativa të vjetra politike. Ai deklaroi se shumë prej pretendimeve të ngritura në sallën e gjyqit, sipas tij, janë të njëjta me ato të përdorura gjatë fushatave zgjedhore në Kosovë.
Thaçi akuzoi Prokurorinë për përpjekje për të diskredituar dëshmitë e zyrtarëve të lartë ndërkombëtarë, përfshirë përfaqësues të NATO-s, Shteteve të Bashkuara, Britanisë së Madhe dhe Organizatës së Kombeve të Bashkuara, të cilët, sipas tij, kanë qenë të pranishëm në Kosovë gjatë luftës. Ai e cilësoi si “qesharake” pretendimin se kishte mashtruar bashkësinë ndërkombëtare gjatë asaj periudhe, ndërsa shtoi se Prokuroria po mbështetet në dëshmi të fabrikuara nga epoka e regjimit të Slobodan Milošević.
Duke iu referuar Konferencës së Rambujesë, Thaçi tha se kishte mbështetur hetimin e krimeve të supozuara nga të gjitha palët nga Tribunali për ish-Jugosllavinë, ndërsa pas përfundimit të luftës, sipas tij, kompetencat për hetimet ishin në duart e autoriteteve ndërkombëtare. Ai theksoi se pas shpalljes së pavarësisë, si kryeministër dhe më pas si president, kishte mbështetur vazhdimin e hetimeve të pavarura nga misioni i EULEX.
Në përfundim, Thaçi kërkoi që vendimi i trupit gjykues të bazohet në Kushtetutën e Kosovës, ligjet në fuqi dhe provat e paraqitura gjatë procesit, duke insistuar se akuzat ndaj tij nuk qëndrojnë dhe se drejtësia për viktimat nuk mund të vendoset, sipas tij, përmes ndjekjes selektive apo dënimit të të pafajshmëve. m.k
