Filiali holandez i markës së njohur luksoze Louis Vuitton është gjobitur me 500 mijë euro nga prokurorët, pas dyshimeve për shkelje të rregullave kundër pastrimit të parave. Kompania u përfshi në një hetim të gjerë të autoriteteve holandeze, të cilat konstatuan se për një periudhë të gjatë nuk ishte verifikuar siç duhet identiteti i klientëve që kryenin blerje të mëdha dhe të përsëritura me para në dorë.
Sipas hetimit, çështja u zbulua pas transaksioneve të një 53-vjeçari shqiptar, i dënuar më herët për vepra penale. Thanas Bako, me origjinë nga Saranda, dyshohet se realizonte blerje të shumta në dyqanet e markës luksoze si pjesë e një skeme për pastrimin e parave.
Prokurorët bëjnë me dije se fondet përdoreshin përmes një 36-vjeçareje nga Lelystad, e identifikuar si Bei W, e cila dyshohet se ka shpenzuar mbi 2 milionë euro para me origjinë të paligjshme gjatë periudhës gusht 2021 – shkurt 2023. Ajo përdorte pseudonime të ndryshme për të blerë artikuj luksozë, përfshirë produkte të Louis Vuitton, të cilat më pas i dërgonte në Kinë të paketuara në kuti kartoni për rishitje, duke i paraqitur të ardhurat si aktivitet tregtar të ligjshëm.
Sipas autoriteteve, kjo skemë njihet si tregtia “Daigou”, një praktikë që përdoret për transferimin e parave të pista përmes shitblerjes së mallrave luksoze. Si prova janë sekuestruar mesazhe komunikimi, fatura si dhe pamje nga kamerat e sigurisë. Në banesën e gruas janë gjetur gjithashtu pako të gatshme për t’u nisur drejt Kinës.
Mediat raportojnë se ajo është ndihmuar nga një ish-asistent shitjesh i markës, i cili e informonte për ardhjen e produkteve të reja dhe e këshillonte si të ndante blerjet për të shmangur detyrimet ligjore të raportimit.
Ndërkohë, nga 1 janari 2026, ligji në Holandë ndalon pranimin e pagesave cash mbi 3 mijë euro. a.b
