Sali Berisha
Kryetari i Partisë Demokratike, Sali Berisha, deklaroi se PD nuk do të bëhet pjesë e asnjë ndërhyrjeje në ligjet dhe funksionimin e sistemit të drejtësisë, duke theksuar se gjyqtarët dhe prokurorët kanë të drejtë të plotë të kërkojnë paga sipas frymës së Kushtetutës dhe ligjeve në fuqi.
I pyetur nga gazetarja Marsi Korreshi lidhur me debatet për pagat e gjyqtarëve dhe paralajmërimet e bëra nga ish-ministri i Drejtësisë, Ulsi Manja, Berisha u shpreh se çdo tentativë për ndërhyrje politike në drejtësi është e papranueshme.
Sipas tij, gjyqtarët dhe prokurorët kanë të drejtë të refuzojnë një piramidë pagash që, siç tha, është ndërtuar mbi qëllime të errëta politike. Berisha kujtoi se edhe në periudha të mëparshme, kur pagat e gjyqtarëve të Krimeve të Rënda varionin nga 1400 deri në 1600 euro, nuk ka pasur ankesa, pasi sistemi i pagave ishte në përputhje me Kushtetutën.
Kreu i PD-së akuzoi kryeministrin Edi Rama se ka krijuar, sipas tij, një grup mercenarësh të superpaguar për të goditur opozitën, duke vendosur paga që nuk ekzistojnë në asnjë vend tjetër të Europës, në një shtet që ka ndër pagat më të ulëta në kontinent.
Në vijim të deklaratës së tij, Berisha solli në vëmendje edhe një rast që, sipas tij, dëshmon përdorimin e drejtësisë për qëllime politike. Ai tregoi se një kompani e quajtur “Mektrin” është kontrolluar dy herë radhazi për të gjetur dokumentet e një automjeti “Range Rover”, që pretendohej se ishte blerë nga Flamur Noka.
Sipas Berishës, nga verifikimet rezultoi se automjeti ishte blerë nga ish-kreu i PD-së, Lulzim Basha, fakt që, sipas tij, nuk u interesoi më hetuesve, pasi rasti nuk mund të përdorej për të implikuar Flamur Nokën. “Dokumentet u refuzuan sapo u pa se makina ishte blerë nga Lul Basha”, u shpreh Berisha. a.b
