Kreu i Partisë Demokratike, Sali Berisha, ka hedhur akuza të forta ndaj kryeministrit Edi Rama dhe familjes së tij, duke deklaruar se shqiptarët kanë paguar mbi 300 milionë euro për ndërtimin e pallatit që, sipas tij, i përket bashkëshortes së kryeministrit, Linda Rama.
Në një deklaratë publike, Berisha u shpreh se ajo që ai e cilësoi si “Mafia e Surrelit” është, sipas tij, mafia më e rrezikshme në Europë, e cila u kushton qytetarëve shqiptarë qindra miliona e miliarda euro në çdo punë publike dhe tender shtetëror.
“Kam zgjedhur të ndalem sot para qytetarëve shqiptarë për t’u treguar se sa paguajnë ata për pallatin në pajë të Linda Ramës. Një pallat për të cilin Linda Rama dhe bashkëshorti i saj nuk janë në gjendje të paraqesin asnjë faturë doganore, tatimore, ndërtimore apo mjedisore”, deklaroi Berisha.
Sipas tij, pallati është ndërtuar në sheshin e pallateve, në tokë që, sipas Berishës, i përkiste familjes së bashkëshortes së kryeministrit, në kundërshtim me çdo kriter urbanistik. Ai theksoi se objekti ka pesë kate mbi tokë dhe po aq nën tokë, pa asnjë dokument justifikues për burimin e financimit.
Berisha rikujtoi gjithashtu se, në kohën kur Partia Demokratike denoncoi çështjen me dokumente dhe kur ILDKPI nisi procedurat e hetimit për origjinën e pasurisë, kryeministri Rama shkarkoi, sipas tij në mënyrë antikushtetuese dhe antiligjore, ish-zyrtaren Zana Xhuka, për të mbrojtur veten dhe familjen e tij.
Në vijim, kreu i PD-së u ndal te kompania ndërtuese e pallatit, kompania “2T”, e lidhur sipas tij me biznesmenin Sako, duke deklaruar se kjo kompani është shpërblyer përmes tenderëve publikë me shuma marramendëse.
Berisha solli si shembull rrugën Qukës–Qafë Plloçë, një projekt 43 kilometra i nisur në vitin 2009 me financim prej 73 milionë dollarësh nga Banka Islamike, e cila pas vitit 2013, sipas tij, iu besua ndërtuesit të pallatit. Ai akuzoi se kostoja e kësaj rruge është fryrë deri në mbi 300 milionë euro, ndërsa vlera reale, sipas tij, shkon deri në rreth 400 milionë euro.
“Shqiptarët e kanë paguar këtë pallat më shtrenjtë se frëngu pulën”, u shpreh Berisha, duke e cilësuar çështjen si një nga skandalet më të rënda financiare. a.b
