Kreu i Partisë Demokratike, Sali Berisha, ka sulmuar ashpër Gjykatën Kushtetuese, duke e akuzuar se po vepron në shkelje të Kushtetutës dhe në shërbim të kryeministrit Edi Rama. Në një deklaratë për mediat, Berisha u shpreh se vendimet e fundit të kësaj gjykate dëshmojnë, sipas tij, një degradim të thellë të institucionit më të lartë kushtetues në vend.
Sipas Berishës, Gjykata Kushtetuese ka firmosur për herë të tretë radhazi zgjatjen e afateve për vendim ndaj çështjes Balluku, duke treguar se nuk vepron si garantuese e ligjit dhe Kushtetutës, por si zbatuesja “më kriminale” e urdhrave të qeverisë. Ai e cilësoi këtë sjellje si një akt vetëposhtërimi institucional dhe si dëm të rëndë për interesin publik.
Kreu i opozitës deklaroi se këto vendime cenojnë interesat e qytetarëve, duke përmendur varfërinë, emigracionin masiv dhe mungesën e shërbimeve bazë, ndërsa akuzoi gjykatën se mbron zyrtarë të përfshirë në afera korruptive.
Berisha shtoi se me këto qëndrime, Gjykata Kushtetuese po dëmton rëndë imazhin e Shqipërisë në arenën ndërkombëtare dhe po e kthen vendin në një shtet pa ligj dhe pa Kushtetutë. Ai e cilësoi situatën si një nga format më të rënda të degradimit institucional. a.b
