Kryetari i Lidhjes Demokratike të Kosovës, Lumir Abdixhiku, ka kaluar votëbesimin e kërkuar në Kuvendin e partisë, raportojnë mediat në Kosovë. Mbledhja e Kuvendit të LDK-së është zhvilluar me dyer të mbyllura.
Pas rezultatit të zgjedhjeve të parakohshme parlamentare të 28 dhjetorit, Abdixhiku i ka paraqitur Kuvendit të partisë dorëheqjen nga posti i kryetarit, duke e vënë atë në dispozicion të delegatëve për vendimmarrje. Në përfundim të diskutimeve, Kuvendi vendosi t’i rinovojë besimin.
Në zgjedhjet e fundit, LDK-ja arriti 13.24 për qind të votave, rezultati i dytë më i dobët i partisë që nga periudha e pasluftës. Ky rezultat ka nxitur debate të forta brenda strukturave partiake, ku një pjesë e figurave drejtuese kanë kërkuar dorëheqjen e parevokueshme të Abdixhikut, duke mos u pajtuar me vendimin për votëbesim.
Mes zërave kritikë ishte edhe Hykmete Bajrami, e cila ka dhënë dorëheqje të parevokueshme nga pozita e nënkryetares së LDK-së dhe ka kërkuar publikisht të njëjtin hap edhe nga kryetari i partisë.
Gjatë fjalës së mbajtur para Kuvendit partiak, Abdixhiku u shpreh se vendimi për t’u përballur me delegatët erdhi nga ndjenja e përgjegjësisë dhe jo nga lehtësia e situatës. Ai theksoi se drejtuesit politikë maten në momentet e vështira, kur duhet të flasin edhe atëherë kur fjala u dridhet.
