Kreu i PD, Sali Berisha sqaroi sot gjatë një bisede me ndjekësit në rrjete sociale në lidhje me atë që u konsiderua ndërprerje flagrante e fjalës në Strasburg.
Berisha shpjegoi se koha e fjalës për diskutantët në Asamblenë Parlamentare të Këshillit të Europës është e kufizuar në dy minuta dhe ndërpritet automatikisht nga sistemi. Ai theksoi se ishte plotësisht i vetëdijshëm për këtë rregull dhe se mesazhin kryesor e kishte përcjellë që në minutën e parë të fjalës.
Sipas Berishës, edhe pse zëri ndërpritet automatikisht pas përfundimit të kohës, transmetimi me kamera vazhdon, çka i ka mundësuar atij të përcjellë mesazhin politik, përfshirë edhe kërkesën për ngritjen e një qeverie teknike.
Ai reagoi ashpër ndaj mediave që raportuan se fjala iu pre ose se ai nuk ishte i ftuar në Strasburg, duke i cilësuar këto lajme si manipulime që synojnë të mashtrojnë opinionin publik. Berisha sqaroi se është anëtar i Asamblesë Parlamentare të Këshillit të Europës dhe se anëtarët e saj nuk kanë nevojë për ftesë për të marrë pjesë në punimet e institucionit.a.b
