Konferenca e kryetarëve
Partia Socialiste ka hequr dorë, të paktën për momentin, nga kërkesa për të pasur shumicën në Komisionin e Reformës Territoriale, me kusht që Partia Demokratike të rikthehet në punimet e këtij komisioni. PS e ka bërë këtë propozim gjatë mbledhjes së Konferencës së Kryetarëve.
Sipas socialistëve, nëse PD është serioze në qëndrimin e saj se nuk po bojkoton reformën territoriale, atëherë komisioni duhet të mblidhet të hënën për të verifikuar pjesëmarrjen e opozitës. Në rast se përfaqësuesit e PD marrin pjesë në mbledhje, PS ka shprehur gatishmërinë për të tërhequr formulën e propozuar më herët për heqjen e barazisë në përbërjen e komisionit.
Gjatë diskutimeve në Konferencën e Kryetarëve, kreu i grupit parlamentar të PD-së, Gazment Bardhi, ka mohuar bojkotin e punimeve, duke sqaruar se mungesat kanë qenë për arsye angazhimesh të tjera. “Nuk ka pasur bojkot. Thjesht në dy data kur ishin planifikuar mbledhje, anëtarët tanë nuk kanë qenë të pranishëm për shkak të angazhimeve të tjera”, mësohet të ketë deklaruar Bardhi.
Ai ka kritikuar ashpër mazhorancën për mungesë vullneti për dialog dhe konsensus, duke theksuar se procesi duhet të zhvillohet në përputhje me rekomandimet e Bashkimit Europian. “Ne kërkojmë procese konsensuale dhe mekanizma dialogu. Ju i refuzoni këto dhe silleni sikur opozita është vetëm një fasadë për të krijuar përshtypjen se gjithçka funksionon normalisht. Por asgjë nuk është normale. Këtë e dinë edhe partnerët tanë ndërkombëtarë”, është shprehur Bardhi.
Sipas tij, mazhoranca nuk synon interesin e qytetarëve, por ridizenjimin e hartës elektorale. Ai ka kujtuar reformën e vitit 2014, duke e cilësuar atë si një proces që, sipas opozitës, dëmtoi pushtetin vendor dhe interesat e qytetarëve.m.k
