Rrjeti B40
76 kryebashkiakë të Rrjetit të Qyteteve të Ballkanit B40 kanë reaguar me një letër të përbashkët, ku shprehin shqetësimin e tyre për mbajtjen në paraburgim pa afat të Kryetarit të Bashkisë së Stambollit, Ekrem İmamoğlu, dhe Kryetarit të Bashkisë së Tiranës, Erion Veliaj.
Në letrën solidarizuese, kryebashkiakët theksojnë se janë “thellësisht të shqetësuar për shfaqjen e një trendi të rrezikshëm që kërcënon demokracinë vendore në Ballkan dhe në botë”, duke e cilësuar paraburgimin pa afat si një praktikë që minon parimet demokratike.
“Pavarësisht përkatësive tona të ndryshme politike, ne jemi të bashkuar në ngritjen e alarmit për paraburgimin pa afat të Kryetarit të Bashkisë së Stambollit, Ekrem İmamoğlu, dhe Kryetarit të Bashkisë së Tiranës, Erion Veliaj”, thuhet në letër.
Sipas tyre, largimi nga detyra i zyrtarëve të zgjedhur pa një vendim përfundimtar “nuk është drejtësi”, por një cenim i drejtpërdrejtë i vullnetit të qytetarëve. Kryebashkiakët i referohen edhe raportit të tetorit 2025 të Komisionit të Venecias, i cili paralajmëron se paraburgimi i kryetarëve në detyrë përbën rrezik serioz për qeverisjen demokratike.
“Kur paraburgimi zbatohet pa afat, qytetarët privohen nga përfaqësimi dhe përfaqësuesit e zgjedhur mënjanohen pa një procedurë të rregullt ligjore”, nënvizohet më tej.
Në letër sqarohet se nënshkruesit nuk kërkojnë imunitet dhe as nuk komentojnë akuzat, por bëjnë një thirrje parimore: “T’i jepet fund paraburgimit pa afat dhe t’u lejohet kryetarëve të presin në liri procedurat ligjore, duke ushtruar njëkohësisht mandatet e besuara nga qytetarët”.
Në përfundim, kryebashkiakët e rrjetit B40 u bëjnë thirrje autoriteteve përkatëse të respektojnë standardet evropiane dhe të mbrojnë demokracinë vendore, duke garantuar legjitimitetin e mandateve të zgjedhura. a.b
