Nisma ligjore e qeverisë për rishikimin e neneve që lidhen me fyerjen dhe shpifjen ka ndezur reagime të forta në publik dhe opozitë. Ndërsa mazhoranca pretendon se ndryshimet synojnë dekriminalizimin e shpifjes për gazetarët, opozita e sheh këtë nismë si një tentativë për të kufizuar lirinë e medias.
Në një intervistë për SYRI TV, Drejtori i Komunikimit në Partinë Demokratike, Alfred Lela, e cilësoi nismën si një “përpjekje të vjetër të Edi Ramës për të vendosur censurë”. Sipas tij, ky është tentimi i katërt ose i pestë për të futur mekanizma që ngushtojnë hapësirat e lirisë së shprehjes.
“Një gazetar, nëse do të duhej të zgjidhte, do të zgjidhte gjithmonë lirinë e shprehjes dhe jo censurën. Kaq mjafton për ta mbyllur debatin,” u shpreh Lela.
Ai kritikoi ashpër gjuhën e kryeministrit ndaj medias, duke theksuar se ajo ka qenë gjithmonë e shoqëruar me përçmim dhe dëshirë për kontroll. Sipas Lelës, Rama e sheh veten si të pasulmueshëm, ndërsa kritikët i trajton si armiq politikë ose si njerëz që “nuk e kuptojnë rolin e tij historik”, tipare që, sipas tij, i përkasin një qasjeje autokratike.
Duke iu referuar shprehjes “timonin për vete” në vitin 2017, Lela theksoi se ambicia e Ramës nuk ka qenë vetëm kontrolli ekonomik, por edhe “timonin e fjalës”, pra kontrollin e medias, portaleve dhe rrjeteve sociale, veçanërisht atyre që kritikojnë pushtetin.
