Berisha në konferencë shtypi
Kryetari i Partisë Demokratike, Sali Berisha, ka bërë thirrje për mobilizim qytetar, duke e cilësuar ditën e nesërme si një moment vendimtar për opozitën dhe qytetarët shqiptarë.
Në një deklaratë për mediat, Berisha u shpreh se protesta e paralajmëruar është “prova e madhe e guximit, revoltës dhe ngadhënjimit qytetar mbi të keqen më të madhe që ka mbërthyer Shqipërinë, që është qeveria Rama, duke e krahasuar situatën aktuale me periudha të errëta të historisë së vendit.
Sipas tij, nesër qytetarët dhe populli opozitar do t’i bëjnë “gjyqin kryehajdutit të këtij kombi”, duke akuzuar kryeministrin Edi Rama për lidhje me krimin e organizuar, bandat dhe trafikun e paligjshëm. Berisha e quajti kreun e qeverisë “armik të lirive dhe votës së shqiptarëve”, duke e akuzuar për qëndrim në pushtet përmes mjeteve të paligjshme dhe shkeljes së Kushtetutës.
Kreu i PD-së deklaroi gjithashtu se qeverisja aktuale ka sjellë pasoja të rënda demografike, duke pretenduar se gjatë dhjetë viteve të fundit mbi 1 milion e 100 mijë shqiptarë janë larguar nga vendi vetëm drejt hapësirës evropiane.
“Nesër është dita e gjykimit të popullit shqiptar ndaj një organizate kriminale që nuk ka precedent sot në asnjë vend tjetër të Europës”, u shpreh Berisha, duke e cilësuar protestën si një akt qytetar kundër asaj që ai e quan kapje totale e shtetit. a.b
