Nënshkrimi i marrëveshjes me Trump
Kryeministri shqiptar Edi Rama nuk mori pjesë sot në Davos gjatë ceremonisë së firmosjes së marrëveshjes për krijimin e të ashtuquajturit “Bordi i Paqes”, një nismë e ndërmarrë nga presidenti i SHBA-së, Donald Trump, edhe pse Shqipëria ka shprehur zyrtarisht qëndrimin e saj pro kësaj marrëveshjeje.
Në kuadër të Forumit Ekonomik Botëror, Trump firmosi marrëveshjen së bashku me krerë shtetesh dhe përfaqësues të vendeve që kishin pranuar ftesën e tij për t’u bërë pjesë e këtij organizmi të ri ndërkombëtar, të cilin ai e prezantoi si një instrument të ri për ndërmjetësim diplomatik dhe ndikim global.
Ndërsa Rama nuk ndodhej në Davos por në Tiranë, Kosova u përfaqësua nga presidentja Vjosa Osmani, e cila mori një ftesë personale nga Trump për përfshirjen e Kosovës në këtë nismë. Para firmosjes, Osmani dhe Trump zhvilluan një bisedë të shkurtër kokë më kokë, të shoqëruar me shtrëngim duarsh, përpara se presidentja e Kosovës të hidhte firmën duke përfaqësuar zyrtarisht Prishtinën.
Gjatë fjalimit të tij në Davos, Trump e cilësoi Bordin e Paqes si “një nga mekanizmat dhe instrumentet më të rëndësishme që janë krijuar ndonjëherë”, duke theksuar se “pothuajse çdo vend dëshiron të jetë pjesë e këtij grupi”. Me stilin e tij karakteristik, ai nuk i kurseu batutat, duke deklaruar se liderët e këtij grupi i pëlqen pothuajse të gjithë, “përveç dy ose tre që nuk i duroj dot”. a.b
