Berisha në foltoren e sotme në Tiranë
Lideri i opozitës, Sali Berisha, gjatë fjalës së mbajtur mbrëmjen e sotme në foltoren e zhvilluar në Poligrafik në Tiranë, ka hedhur akuza të forta ndaj mediave që, sipas tij, janë të kapura nga pushteti dhe shërbejnë si instrument propagande për qeverinë.
Berisha deklaroi se shqiptarët janë vendosur nën një “agresion barbar mediatik”, duke theksuar se një pjesë e madhe e mediave financohen dhe favorizohen drejtpërdrejt nga pushteti përmes tokave, koncesioneve dhe privilegjeve të tjera. “Ju keni qenë, në tërësi shqiptarët, dhe jeni në një agresion barbar mediatik. Barbar!”, u shpreh kreu i PD, duke akuzuar pronarë mediash se kanë përfituar prona publike në këmbim të mbështetjes politike.
Sipas Berishës, këto media kanë si mision mashtrimin e qytetarëve dhe glorifikimin e qeveritarëve të korruptuar. “A e dini ju se jo në një, por në tre bordero firmosin mashtruesit profesionistë që kalojnë nga një studio në studio tjetër, vetëm e vetëm se si të mashtrojnë qytetarët dhe si t’u thurin lavdi qeveritarëve hajdutë”, deklaroi ai nga foltorja. m.k
