Kreu i Partisë Demokratike, Sali Berisha, ka ftuar qytetarët sot të marrin pjesë në protestën kombëtare që do të zhvillohet më 24 janar, duke e cilësuar atë si një moment vendimtar për krijimin e një fronti të vërtetë opozitar kundër qeverisë së kryeministrit Edi Rama.
Berisha ndërsa e mori fjalën në foltoren e opozitës para Kryeministrisë thekson se protesta synon t’i dërgojë mesazhe të qarta dhe përfundimtare kryeministrit Rama, duke i bërë thirrje të heqë dorë nga ajo që ai e quan “grusht shteti” dhe të pranojë ligjin dhe Kushtetutën. Sipas tij, në të kundërt, opozita do ta nxjerrë qeverinë jashtë rendit kushtetues.
Berisha u bëri thirrje qytetarëve që të mblidhen masivisht në shesh më 24 janar për të treguar, sipas tij, fuqinë e bashkimit, guximin dhe shpirtin e pamposhtur të opozitës shqiptare. Ai theksoi se ditët në vijim janë vendimtare për komunikimin me çdo qytetar dhe intelektual, pavarësisht bindjeve politike, duke dënuar konformizmin si një pengesë serioze për rolin e intelektualëve në shoqëri.
Në deklaratën e tij, kreu i PD-së e cilësoi qeverisjen aktuale si një diktaturë autokratike dhe kleptokratike, duke e akuzuar Edi Ramën si narkodiktatorin e parë dhe të vetëm në Europë. Ai theksoi se vetëm një front i gjerë opozitar mund të sjellë ndryshimin politik në vend.
Berisha u drejtua edhe të rinjve, duke i ftuar të angazhohen aktivisht në protestë dhe në përpjekjet për rrëzimin e regjimit aktual. Sipas tij, brezi i ri është bartësi i misioneve të mëdha historike dhe ka rolin kyç në përmbysjen e diktaturave dhe epokave politike. m.k
