Vjosa në Urën e Mifolit
Lumi Vjosë ka arritur nivelin 9 metra në urën e Mifolit, në zonën e Novoselës, duke përkeqësuar ndjeshëm situatën dhe duke krijuar rrezik për banorët përreth si dhe për tokat bujqësore.
Bashkia e Vlorës, në koordinim me strukturat e emergjencave civile, Agjencinë Kombëtare të Mbrojtjes Civile dhe Forcat e Armatosura, ka angazhuar të gjitha kapacitetet në terren dhe ndodhet në gatishmëri të plotë për të asistuar banorët. Ndihma parashikohet si në rast nevoje për evakuim, ashtu edhe për marrjen e masave të nevojshme për shpëtimin dhe garantimin e sigurisë së bagëtive.
Autoritetet vendore u bëjnë thirrje qytetarëve të zbatojnë me rigorozitet udhëzimet e strukturave përgjegjëse në terren dhe të shmangin lëvizjet e panevojshme në zonat e rrezikuara, deri në përmirësimin e situatës.
Ndërkohë, prurje të konsiderueshme janë regjistruar edhe në Memaliaj, ku niveli i lumit ka shkuar në 7.5 metra. Si pasojë e reshjeve të dendura, raportohet se janë përmbytur rreth 100 hektarë tokë bujqësore, ndërsa uji ka hyrë në 14 banesa. Përmbytje janë evidentuar gjithashtu në tokat e zonave Bishan dhe Fitore.
Situata paraqitet problematike edhe në Stacionin e Pompimit të Kafarajt, në Njësinë Administrative Frakull, ku ka prezencë uji si pasojë e prurjeve të lumit. Nga ky stacion sigurohet furnizimi me ujë i qytetit të Fierit, çka e bën situatën edhe më delikate. r.k
