Reshjet e dendura të shiut vështirësojnë qarkullimin, Policia devijon trafikun në aksin Tiranë–Durrës
Policia e Shtetit ka dalë me një apel për kujdes maksimal në rrugë, për shkak të reshjeve të dendura të shiut që kanë vështirësuar qarkullimin e mjeteve në disa zona të vendit.
Sipas njoftimit zyrtar, situata paraqitet problematike në rrugën interurbane Tiranë–Durrës, konkretisht në zonën pranë karburantit në hyrje të Durrësit, ku ka prezencë të lartë të ujit në të dyja anët e lëvizjes, duke e bërë të pamundur qarkullimin normal të automjeteve.
Për të shmangur trafikun dhe rrezikun e aksidenteve, Policia Rrugore ka vendosur devijimin e lëvizjes si më poshtë:
Automjetet që vijnë nga jugu në drejtim të Tiranës do të qarkullojnë nga Rruga e Plepave për në Ndroq dhe më pas nga aksi “Rrogozhinë–Elbasan–Tiranë”.
Për drejtim Durrës, kalimi do të bëhet nga rruga e universitetit, në drejtim të Spitallës dhe më pas në aksin “Tiranë–Elbasan–Rrogozhinë”.
Policia u bën thirrje drejtuesve të mjeteve të shmangin lëvizjet e panevojshme, të tregojnë kujdes të shtuar gjatë qarkullimit, të ndjekin udhëzimet e punonjësve të Policisë dhe të respektojnë sinjalistikën rrugore.
