Berisha në një bisedë në rrjete sociale
Kryetari i Partisë Demokratike, Sali Berisha, ka komentuar sot në një bisedë me ndjekësit në rrjete sociale, zhvillimet e fundit në Venezuelë, duke e cilësuar rrëzimin dhe arrestimin e presidentit Nicolás Maduro si një lajm shumë të mirë jo vetëm për popullin venezuelas, por edhe për shqiptarët. Sipas Berishës, këto ngjarje përbëjnë një inkurajim të fortë për opozitën shqiptare që të intensifikojë përpjekjet për largimin nga pushteti të kryeministrit Edi Rama, të cilin ai e quan “klonin e Maduros”.
“Largimi i Maduros nga pushteti, këtij diktatori të lidhur me drogën dhe manipulimin e zgjedhjeve, është një lajm i mirë për të gjithë njerëzit e lirë kudo në botë. Por është një lajm shumë i mirë edhe për shqiptarët, të cilët përjetojnë regjimin e klonit të tij në Shqipëri, të quajtur nga mediat Ramaduro”, u shpreh Berisha.
Ai theksoi se zhvillimet në Venezuelë duhet të shërbejnë si motivim për opozitën shqiptare që të përmbushë, sipas tij, detyrën historike për rrëzimin e një pushteti që “qëndron mbi votën e grabitur, lidhjet me krimin dhe drogën dhe vjedhjet e shqiptarëve”. Berisha përmendi gjithashtu protestat në Iran, duke uruar që edhe regjimi i ajatollahëve të ketë të njëjtin fat si Maduro.
Në një tjetër deklaratë, Berisha akuzoi drejtpërdrejt kryeministrin Edi Rama dhe ministrat e tij për korrupsion masiv, duke thënë se sot vjedhjet janë të dokumentuara “me firma dhe vula”. Ai e cilësoi procesin zgjedhor të 11 majit 2025 si një “farsë të vërtetë elektorale”, ndryshe nga zgjedhjet e vitit 2009, të cilat sipas tij dhe vlerësimeve të OSBE-ODIHR, përmbushën standardet kryesore të zgjedhjeve të lira dhe të ndershme.
“Këto përbëjnë motive ligjore, kombëtare dhe ndërkombëtare që opozita shqiptare të mobilizohet me gjithë forcën për rrëzimin e këtij pushteti, krijimin e një qeverie teknike dhe zhvillimin e zgjedhjeve të reja”, deklaroi Berisha.
Lidhur me mënyrën e veprimit të opozitës, kreu i PD-së u shpreh se rrugë tjetër për largimin e qeverisë nuk ka, përveç protestës së vazhdueshme. “Protesta e vazhdueshme do të fillojë pa asnjë diskutim dhe është rruga e vetme për t’u ndarë nga ky regjim”, theksoi ai.
Berisha foli gjithashtu për idenë e krijimit të një qeverie teknike, duke sqaruar se ajo duhet të jetë një qeveri që besohet dhe mbështetet nga të gjitha palët politike. Në këtë kuadër, ai njoftoi se Partia Demokratike do të organizojë së shpejti një tryezë të përbashkët me forca të tjera politike dhe faktorë të shoqërisë shqiptare.
“Do të krijojmë një front sa më të gjerë të përbashkët në këtë betejë vendimtare për fatin e demokracisë në Shqipëri kundër Edi Ramës”, përfundoi Berisha. r.p
