Gjykata Kushtetuese
Gjykata Kushtetuese ka reaguar zyrtarisht përmes një sqarimi për publikun dhe median, duke përgënjeshtruar si tërësisht të pavërteta deklaratat e bëra së fundmi nga subjekte të ndryshme publike dhe private lidhur me procedurën dhe rezultatin e votimit për pezullimin e zbatimit të disa vendimeve gjyqësore.
Reagimi lidhet me vendimet nr.118, datë 19.11.2025, dhe nr.120, datë 22.11.2025, të Gjykatës së Posaçme të Shkallës së Parë për Korrupsionin dhe Krimin e Organizuar, në pjesën që parashikon caktimin dhe vazhdimin e masës ndaluese “pezullimi i ushtrimit të një detyre a shërbimi publik” ndaj shtetases Belinda Balluku.
Gjykata Kushtetuese thekson se çështja ndodhet ende në një procedurë gjyqësore kushtetuese në vijim dhe bën me dije se më datë 22 janar 2026 ajo do të shqyrtohet në seancë plenare publike. Në këtë proces janë përfshirë si palë kërkuese Kryeministri i Republikës së Shqipërisë, ndërsa subjekte të interesuara janë Presidenti i Republikës, Kuvendi i Shqipërisë, Prokuroria e Posaçme kundër Korrupsionit dhe Krimit të Organizuar si dhe Gjykata e Posaçme e Shkallës së Parë për Korrupsionin dhe Krimin e Organizuar.
Për të garantuar zhvillimin e një procesi të rregullt dhe në përputhje me standardet kushtetuese, Gjykata Kushtetuese u bën thirrje të gjithë aktorëve të përfshirë në debatin publik të tregohen të matur dhe të kujdesshëm në deklaratat e tyre, duke shmangur çdo formë paragjykimi apo përgojimi ndaj gjyqtarëve individualë apo institucionit në tërësi. a.b
